Кирил Прцуловски, Дон Кихот од Преспа во борба против пестициди

Во селото Царев Двор во Преспа живее Кирил Прцуловски, производител на храна и застапник на органското производство. Веќе десет години, наместо хемиски пестициди, тој користи препарати за своите овоштарници со јаболка и цреши што самиот ги произведува од органски состојки. Она што природата го остава како „отпад“, тој го преработува, без употреба на хемикалии, и добива раствор со кој ги штити своите овоштарници од штетници. Така, тој произведува органски јаболка од сортата „Ајдаред“ и воопшто не се грижи за количините, туку единствената грижа му е здравото, органско овошје, јаболкото што го нарекува „царица“. Интервјуто со Кирил Прцуловски ја снимивме во неговиот овоштарник каде што го дегустиравме јаболкото „царица“ и ја почувствувавме разликата.