Сите сакаат животни, но кој ќе ги лекува?

Во Македонија има многу луѓе што искрено ги сакаат животните – но љубовта сама по себе не е доволна. Ни требаат ветеринари. Стручни, едуцирани и посветени луѓе кои знаат како да се грижат за сите видови животни – од домашните миленици до дивите видови, вклучувајќи ги и оние за кои речиси и да нема грижа во нашата земја. Во ова видео ги запознаваме Ина Георгиев и Теодора Крстевска – млади студентки на Факултетот за ветеринарна медицина, кои одлучиле да ја претворат љубовта кон животните во животна мисија. Ина зборува за својата страст кон рептилите и змиите, и за недостатокот на ветеринари што се обучени да се грижат за овие животни. Теодора пак ја раскажува својата приказна поврзана со детството и вели дека сака да биде „гласот на оние што не можат да зборуваат“. Нивната работа и посветеност покажуваат дека оваа професија е многу повеќе од едноставна љубов. Потребна е континуирана едукација, практична работа, трпение и желба да се помага дури и таму каде што другите не гледаат проблем. Во видеото зборуваме и за важноста на заштитата на егзотичните и дивите животни, за тоа зошто змиите не се толку опасни колку што мислиме, и за тоа колку е важна улогата на ветеринарот во зачувување на еко-системот. Погледнете го видеото и откријте зошто младите ветеринари се клучни за иднината – не само за животните, туку и за луѓето.