Жената се смета дека е втор заработувач во семејството

Во светот на бизнисот, каде што доминираат мажите, жените сè повеќе успеваат да се истакнат како визионерки, менаџери и лидерки. Никица Мојсовска Блажевски, извршна директорка на организацијата „Македонија 2025“, оваа година беше избрана за жена менаџер на годината – признание кое ја изненади, но и ја поттикна на размислување за сопствениот професионален пат. „Се изненадив од оваа награда, но верувам дека е резултат на долгогодишна работа, во различни сектори, каде што секогаш водев тимови и се трудев да оставам напредок,“ истакна Мојсовска Блажевски. Таа сподели дека ова признание е доказ дека нејзиниот лидерски стил и посветеност се препознаени и почитувани. „Иако често сум критична кон себеси, ова признание е мотивирачко и за мене и за организацијата каде што работам,“ додаде таа. Пречките на нејзиниот пат, како што сподели, биле слични на оние со кои се соочуваат многумина. „Пречките постојат за сите нас, особено за оние од постарите генерации кои започнуваа кариери во време на висока невработеност. Но, спортот, и конкретно мојата кариера како професионален скијач, ме научи на упорност и на тоа дека за успех мора многу да се работи,“ објасни Мојсовска Блажевски. Во контекст на улогата на жените во бизнисот, таа истакна дека, иако не чувствувала директна дискриминација, се соочувала со специфични предизвици. „Како жени, мораме да внимаваме на многу аспекти – од облекувањето до начинот на изразување. Освен тоа, улогата на жената во општеството често е обременета со стереотипи кои ја ограничуваат самодовербата и можностите за напредување,“ нагласи таа, додавајќи дека улогата на жената сè уште е оптоварена со традиционални очекувања. Еден од најголемите предизвици за земјата, според Мојсовска Блажевски, е иселувањето на младите. „Годишно околу 25.000 луѓе емигрираат, главно млади и високообразовани лица. Тоа е резултат на корупцијата, слабата инфраструктура и недостатокот на квалитетни услуги, што создава амбиент во кој животниот стандард е далеку под потребното ниво,“ истакна таа. „Дури и кога платите се слични, младите се решаваат за емиграција поради квалитетот на животот кој е значително подобар во странство.“ Според неа, економските реформи и јасната визија за иднината се клучни за намалување на овој тренд. „Потребни ни се стапки на економски раст повисоки од пет проценти и значително подобрување на јавните услуги. Но, најважно е да имаме јасна визија каде сакаме да одиме како држава и храброст да ги спроведеме неопходните реформи,“ потенцира Мојсовска Блажевски.