Алесто: Првата семејна винарија во Преспа

До шеесеттите години на минатиот век, Преспа имала меѓу петсто и илјада хектари лозја. Потоа луѓето почнале да заминуваат, цели фамилии во Австралија, Америка, Канада, а лозјата останале. Денес, еден млад човек од село Арвати полека ја враќа таа приказна. Александар Димовски не е новодојденец во светот на грозјето. Неговото семејство одгледува грозје и јаболка во Преспа веќе седум генерации, уште во времето кога лозарството беше главна егзистенција на целата котлина. „До шеесеттите години гроздето беше главна егзистенција”, вели Димовски. „Потоа луѓето почнаа да се иселуваат и лозјата исчезнаа.” Пред четири години, тој и неговото семејство одлучиле да го направат следниот чекор: да не продаваат грозје, туку да прават вино. Така настанала Алесто, првата семејна винарија во Преспа. Ова е нивна четврта берба.