„Џифони Македонија 2025“: Простор каде младите зборуваат гласно

Над 400 млади од осум земји во Кинотеката и МКЦ – со филмови, работилници и искрени разговори за животот, уметноста и иднината го одбележаа уште едно 13-тото по ред издание на фестивалот за млади „Џифони Македонија“. Повеќе од 400 учесници од Македонија, Италија, Данска, Швајцарија, Србија, Црна Гора, Косово и Романија добија шанса да зборуваат, создаваат и растат преку филмот. Фестивалот се одвиваше на две локации – во Кинотеката, каде што работат јуниорите (основци од шесто до деветто одделение), и во Младинскиот културен центар, каде кадетите и сениорите (средношколци) се дел од интерактивна програма со проекции, работилници, средби со филмски професионалци и креативни разговори. „Џифони Македонија 2025“ е повеќе од фестивал – тоа е место каде младите се слушаат, се охрабруваат и се учат дека нивниот глас има тежина. И тоа е нешто што останува и по последната проекција.