Фатма Бајрам Аземовска и Викторија Михајловска - Еразмус програмите прават чуда

Фатма Бајрам Аземовска и Викторија Михајловска од здружението за развој на ромската заедница „Сумнал“ раскажуваат за придобивките кои ги имаат и маргинализираните заедници од програмите на Еразмус. Овие две жени со многу енергија и упорност преку Еразмус програмата го менуваат светот на маргинализираните заедници во Скопје и Битола. - Еразмус е програма што прави чуда од нашите животи. Програма што ги менува нашите животи на подобро. Многу често младите немаат можност да излезат од своите средини, а да не зборувам за тоа да можат да одат во странство. Преку овие програми некои од нив за прв пат користат јавен превоз, дали е тоа авион, автобус или железнички превоз. Запознаваат луѓе од различни држави и од различни заедници. Имаат можност да зборуваат на англиски јазик и да си ги подобрат своите јазични способности. Потоа учат за нивната култура и традиција- вели Фатма. - Проектот има за цел да развие школа за лидерство и феминизам конкретно за млади жени Ромки со тоа што ќе креира тренери лидери кои ќе ги вклучуваат овие млади жени Ромки и ќе ги едуцира на најразлични теми кои се потребни на една млада жена Ромка за да може да биде лидерка и да има стекнато самодоверба и самосталност- објаснува Викторија Михајловска.