Kонцерт на Крсте Роџевски и Томика Рид: Интимно патување низ звукот

На 13 септември, сабота во 20:30 часот, љубителите на џезот и експерименталната музика ќе имаат ретка можност да присуствуваат на концерт кој вети интимност, длабочина и уметничка храброст. Во просторот на Македонската филхармонија, Крсте Роџевски и виолончелистката Томика Рид ќе направат концерт посебен не само по формата, туку и по емоционалниот набој што двајцата уметници го носат на сцената. Ова е нивен втор концерт во Скопје, но за разлика од првиот, кој беше со полна банда, сега настапуваат само двајцата – гитара, виолончело и глас. „Овојпат ќе биде дуо концерт, ќе биде интимен концерт. Знам дека салата во Македонска филхармонија е голема, има убава акустика, меѓутоа сепак ќе биде ова концерт со две личности на сцена“, објаснува Роџевски. За концертот во Скопје, тој вели: „Би го опишал како патување на кое треба да се вратиш малку, на кое треба да присуствуваш малку припремен – не припремен во смисла на музичка форма и композиција, него да имаш способност малку да се олабавиш и да слушаш... да те однесе некаде.“ Сето ова го прави овој концерт нешто повеќе од уште едно музичко случување – тоа е покана за лично и заедничко патување низ звукот, спомените и емоциите. За сите оние што сакаат музика што зборува, чувствува и предизвикува, концертот на Крсте Роџевски и Томика Рид е настан што не треба да се пропушти.