Сашо Поповски: Џезот е музика на човечкиот род

Сашо Поповски е џез музичар од четвртата генерација македонски уметници, шеф на џез-одделот при музичката академија на универзитетот Гоце Делчев – Штип, композитор и педагог. Во 2011 година го започнува патувањето со „Џез фабрика фест“, најпрво како мултимедијална работилница за млади, а потоа и како фестивал кој е активен и денес во неговата родна Битола. Дел е од музичката академија при УГД Штип од 2008 година. На почетокот како стручњак од пракса, а денес редовен професор и шеф на катедрата за џез-музика при Музичката академија. Токму џез-оделот во голема мера има придонесено за развојот на џез-сцената кај нас. Голем број млади музичари кои во изминативе неколку години ја збогатија македонската џез-култура се токму производ на оваа катедра. Го прашавме Сашо што е џез за него? -Тоа е многу тешко прашање, не знам кој би можел да го одговори точно. Можеби најдобрата дефиниција е на Дјук Елингтон музика на човечкиот род, мојот колега Тони Китановски тоа го кажува стално. А мене ако ме прашате, џез па не би можел конкретно да ви кажам. Се она што е убава музика околу нас може да биде класифицирано како џез.