WITCON 2025: Како жените ја трансформираат технологијата во Македонија

Минатата сабота, во хотел Marriott Skopje, се одржа третото издание на конференцијата WITCON – настан кој го обединува светот на вештачката интелигенција, иновацијата и технологијата. Со повеќе од 450 учесници, 65+ говорници и претставници на над 100 компании од Македонија, регионот и светот, ова издание беше најавено како дводневен концепт со цел да понуди не само знаење и професионално вмрежување, туку и инспирација за следната генерација технолошки лидери. Првпат оваа година конференцијата се одржа во дводневна форма, со онлајн присуство на 21 ноември и целодневна активност на 22 ноември во хотелот. Идејата на WITCON е да ги спои професионалците, пионерите и младите таленти на едно место, овозможувајќи размена на знаења, искуства и идеи. Јасмин Алиќ, LinkedIn’s No.1 Creator, беше еден од главните говорници, споделувајќи практични совети за користење на LinkedIn за личен и бизнис раст.