За што ќе кренеш ново Илинденско востание? | Внимание

Внимание: Кој е Св. Илија, што се случи на 2 Август 1944, кој победи во Крушево 1903? Во најновата анкета на „Внимание“ ги прашавме граѓаните дали знаат кој е Свети Илија. Повеќето од граѓаните не знаеја, но знаеја за Илинден како востание: „Илинден е востание“, „Илинденското востание или АСНОМ“. На прашањето „Што се случило на 2-ри Август 1944 во манастирот Прохор Пчињски?“, граѓаните велат: „Можеби некоја седница на АСНОМ... Свети Илија најверојатно играл некоја улога“, „Ден на Илинденското востание“, „Декларација на АСНОМ“, „Првото заседание на АСНОМ..., за Македонија да има своја територија, да биде самостојна држава...“. Ги прашавме и граѓаните „Кој победи во Крушевското востание на 2-ри август 1903 година?“. Еве што ни кажаа: „Не знам, мислам, партизаните“, „Најверојатно Никола Карев“, „Македонците победиле, траело десет дена, но потоа за жал, паднала Крушевската република“, „Победија нашите, 10 дена Крушевска република и толку“, „Ако добро се сеќавам, против Турците сме се бореле, сме победиле во битката“. И, колку траела таа победа? – „Кратко траеше“. Граѓаните дадоа повеќе интересни одговори на прашањето „За што би кренале Илинденско востание денес?“ – „Востание за повеќе права да имаме ние младите...“, „Едноставно, поделено е богатството на многу малку луѓе и затоа би дигнал едно востание, за луѓето да почнат да го користат мозокот, да видат дека се искористени тотално“, „Некое мировно востание“, „Би дигнал востание за тоа колку не се грижиме за природата“, „Против корупција, пошто корупцијата е многу внесена во нашата држава, има многу неправда – секаква корупција, сексуална корупција, корупција на работа, насекаде – и не за џабе на крај сите млади бегаат од државата“.