Зошто младите живеат со родителите? Покасно созреваме, таква држава сме | Внимание

Во најновата анкета на „Внимание“, ги прашавме граѓаните зошто младите во Македонија држат неславен рекорд и живеат најдолго со родителите? Еве што ни кажаа: „Реално, со инфлација, со тоа што не можеме да најдеме стабилна работа, становите плус се прескапи, и со платите што ги имаме, не можеме сами да се издржиме“, „Едноставно, не се осеќаат финансиски доволно стабилни за да се одвојат од дома“, „Поради родителите најмногу, затоа што самите родители ги разгалуваат децата“, „Не работат од мали, почнуваат да работат после средно...“, „Малце зависат од родителите“, „Покасно ние созреваме, таква држава сме“. На прашањето дали младите се разгалени или пак родителите се уфилмани дека децата треба да живеат со нив, граѓаните имаат поделени мислења: „Родителите мислат дека нивните деца треба да живеат до 40 години со нив, воедно и младите се разгалени ради тоа“, „Ја би рекол дека е до парите, треба да заработат некој денар... дур да се преселат на друго место“, „Не е тоа толку до родителите дека ги тераат децата да живеат со нив, него дека ние самите не можеме да си дозволиме да се отселиме сеуште“, „Пола е според мене традиција, пола е можности... а со денешниве цени на станови две и пол, три, четири илјади евра, каде што човек треба да штеди сто, двеста евра од некоја просечна плата месечно, му требаат 5 години за еден квадрат стан, нема никаква логика“. За тоа кога е најдобро еден млад дечко или девојка да се исели од дома и осамостои, граѓаните посочуваат: „На 20, 21 година“, „некои 23, 22“,, 20-22 години“, „после факултет“, „Родителите треба да ги остават децата да размислат кога е вистинското време да се иселат од дома“. На прашањето „Зошто на Запад ги бркаат децата од дома на 21 година?“, еден граѓанин вели: „Па токму заради тоа, да ги натераат да бидат свои луѓе. Треба да се осамостојат, да почнат свој живот... Овдека е малце каша попара“. На прашањето, дали и кај нас ќе почнат младите да живеат сами на 21 година, граѓаните велат: „Не верувам“, „Во скоро време, не верувам“, на што Дениз иронично коментира: „Значи, сепак сме врзани да живееме со мама и со тато, како беше тоа – мама меси, тато носи?“