Народниот правобранител е адвокат на народот. Треба да се грижи за заштита на правата на граѓаните.

Адвокат на народот. Вака наједноставно може да се опише улогата на народниот правобранител во една демократија. Тој е независен орган кој се грижи за заштита на правата на граѓаните. Не е судска, ниту извршна, ниту законодавна власт, но сепак има одредена моќ да им помогне на граѓанините на кои им се прекршени уставните или законските права од јавните служби, локалната или централната власт и други. Седиштето е во Скопје, а има канцеларии во шест градови ( Во анимација се појавуваат Битола, Кичево, Куманово, Струмица, Тетово и Штип) Има овластување да работи на проблеми што ги мачат поединци, но и на масовни појави кои го засегаат општеството. Па така Народниот правобранител постапуваше по предметите за масовното прислушување или за незаконската наплата на радиодифузна такса. Но и поединци, на пример, кои заглавиле во судските лавиринти трошејќи деценија од животот да решат одреден правен спор може да затропаат на вратата на народниот правобранител. Што може да стори тој? Народниот правобранител им дава глас на безгласните. Може јавно да посочи дека некој ги прекршува законските права на граѓаните во обид институцијата што е инволвирана да постапи законски. Може да им посочи на граѓаните како по легален пат да го остварат своето право. Има механизми за покренување на законски измени, може да побара институциите да постапат во согласност со законите. Секогаш ја почитува приватноста и тајноста на податоците на подносителот на претставката за да го заштити од евентуални штетни последици од органот кој му го повредил правото. Во реалноста, политиката ги меша прстите па инволвираните институции неретко му ги врзуваат рацете, молчат или едноставно одбиваат да соработуваат. Правобранителот за тоа може да го извести надлежниот орган, Владата и Собранието. За преиспитување на одредени закони може да поведе постапка и пред Уставниот суд. Годишно, правобранителот работи и до 5.000 предмети со што свесноста за неговата важност како заштитник на немоќните расте. Нецелосната финансиска независност е сидрото што ја кочи поголемата моќ и самостојност на адвокатот на народот.