Доградбите и надградбите се најризичната категорија во Македонија | Проф. Наков

Изминатите години, Скопје и другите градови низ Македонија се соочуваат со интензивна градежна офанзива, но во јавноста сè почесто се поставува прашањето за квалитетот и безбедноста на новите градби. Ова прашање е од особено значење за градежната фела, но и за граѓаните, кои секојдневно се сведоци на предизвиците кои ги носи современото градење. Според проф. д-р Дарко Наков од Градежниот факултет во Скопје и претседател на Друштвото на градежни конструктори на Македонија, во однос на регулативата, доста сме регулирани. Од друга страна, проблем претставуваат дивоградбите и доградбите. -Тие се најризичната категорија на градби кога станува збор за природни појави како земјотреси и поплави,“ предупредува проф. Наков. Тој објаснува дека самиот концепт на доградби и надградби е погрешен, бидејќи тие често водат до несоодветно однесување на објектите при земјотрес. -Кога ќе додадете еден мал тесен објект до голема зграда, нивните различни флексибилности може да доведат до судир и деформации, вели тој, додавајќи дека токму ваквите интервенции би можеле да бидат најголемите слаби точки при некој посилен земјотрес. Тие не само што не ги исполнуваат урбанистичките и архитектонските стандарди, најлошо е што не ги исполнуваат конструкторските стандарди во најголем број случаи. Тоа е една авантура во која не смеевме да влеземе, а започна во 90-тите години на минатиот век, кога го дочекавме влегувањето на приватниот капитал во градежништвото неподготвени, без соодветна законска регулатива и без соодветна свест колку е моќен приватниот капитал и колку може тој да отвора порти на различни нивоа. Таму одлуката е профитот. Повредливоста на тие објекти е многу поголема отколку на објектите што се изградени од почеток како што треба, вели професорот Наков.