Доградба на ООУ „Блаже Конески“ - фаза 2 - работна фаза

Во Општина Аеродром се реализира втората фаза од проектот „Доградба на ООУ ‘Блаже Конески’“, инвестиција во вредност од 254.173.949 денари, насочена кон дополнително проширување и модернизација на едно од основните училишта во населбата Мичурин. Со реализацијата на втората фаза училиштето ќе добие 10 нови училници, кабинет за информатика, современа библиотека, простран хол за дружење, учење и заеднички активности, како и нова спортска сала. Со новата сала, училиштето ќе располага со две спортски сали, со што ќе се создадат дополнителни услови за квалитетна настава по физичко и здравствено образование и развој на спортските активности кај учениците. Значаен дел од проектот е и уредувањето на надворешниот простор. Предвидено е целосно партерно уредување на училишниот двор, поставување нова урбана опрема, изградба на отворено спортско игралиште, хортикултурно уредување со нови садници и зеленило, како и нов паркинг за потребите на училиштето. Предвидено е и опремување со нов училишен мебел. Втората фаза претставува продолжение на поширокиот проект за проширување и модернизација на ООУ „Блаже Конески“. Со завршувањето на актуелната фаза, проектот треба дополнително да ги подобри условите за одвивање на наставата и престојот на учениците, да обезбеди повеќе простор за образовни, спортски и заеднички активности и да создаде поквалитетна училишна средина. #ПроектиЗаТрајнаПромена #НоваЕнергија #НовоЗабрзување