Полицијата се прости од својот колега – Синдикатот бара строги санкции

Колегите и семејството денеска се простија од полицискиот службеник Виктор Цветковски кој вчера го загуби животот на регионален пат Куманово-Свети Николе кога беше прегазен од пијан возач. 37 годишниот полицаец е татко на 6 годишно дете. Меѓу колегите тој важел за професионалец и бил назначен за ментор на полициските практиканти. Во страотната несреќа тој бил заедно со 25-годишен кандидат за полициски службеник, со кој извршувале службена должност. Цветковски починал на лице место, а практикантот со тешки телесни повреди е пренесен во комплексот клиники „Мајка Тереза“ во Скопје. Министерот Оливер Спасовски, синдикатот и колегите денеска присуствуваа на погребот. Полицискиот синдикат испрати соопштение до јавноста со кое бара обвинителството најостро да ги санкционира напаѓачите на полицски службеници.